畢咗業嘅你，喺大學時期最後悔係啲咩？

「霎眼廿七歲時日無多方不敢偷懶」呢句《陀飛輪》嘅歌詞可能係好多啱啱畢業冇耐嘅大學生嘅寫照。如果有機會俾你返到去啱啱入大學嗰一日，你會同以前嘅自己講啲咩，會有啲咩提醒以前嘅自己？經歷過社會無情嘅洗禮之後，我相信好多人都會話：要做好規劃，千祈唔好再俾自己渾渾噩噩咁浪費咗呢四年時間！

初入社會嘅你喺大學有咩遺憾？

點解要做好規劃？

啱啱入大學嘅時候，大家可能都會發覺大學真係比起喺中學自由得多，可以自己揀參加咩活動，幾時上堂，冇人一個班主任喺道管住哂，冇人會迫你做呢樣做嗰樣，除咗要上夠Credit之外好多嘢都可以自由選擇參加。

正正就係因為自由度大咗咁多，有人會一時間適應唔嚟，於是沉溺咗喺眼前享受自由嘅幸福，而冇好好諗清楚，好好計劃喺大學四年有乜嘢目標想達成，又或者規劃好呢四年可以點樣幫助到自己開闢畢業後嘅路途。時間流逝，等到自己醒覺時唔可以再咁落去嘅時候，自己喺大學嘅時日無多，縱使呢個時候不敢偷懶亦好難追得返個進度。

享受嘅同時唔好忘記要規劃未來

生涯規劃最重要嘅其實係你必須要有明確嘅方向，知道自己畢業之後想做啲咩。跟住就住按自己嘅目標訂立計畫，明確咁每一個學年需要做啲咩去一步一步邁向目標，然後嚴格執行自己訂下嘅計劃。

訂立大方向，否則只會原地踏步

好多人會視有做實習視為有做好生涯規劃，咁大學期間係咪一定要做實習？其實就唔係嘅。

去做實習嘅最大目的，其實都係希望可以展現到你有同你未來想做嘅工作嘅相關經驗，喺揾工面試嘅時候可以好好咁表現到自己。的而且確，做實習係其中一項好常見嘅途徑幫助大學生達成生涯規劃其中嘅步伐。

但係冇做到實習亦都唔係世界末日，喺你嘅計劃入面可以有其他事比做實習重要，例如有人會揀去交流、參加學科相關嘅比賽等等。只要有明確嘅計劃知道自己想要啲咩，然後按計劃執行咁就冇問題，有唔少人即使冇去做實習都仍然活得成功、自在。

實習只係其中一種方式

所以各位初入大學嘅朋友，喺享受緊來得太突然嘅自由同幸福嘅同時，謹記要做好規劃，唔好俾自己畢業先至嚟後悔當初冇好好做好未來嘅規劃。