即將畢業嘅你有冇覺得無助？

喺近一兩年疫情嘅影響下，失業率攀升，打工仔想要揾到好工都困難咗，更何況啱啱畢業冇乜經驗可言嘅大學生呢。大學教育資助委員會2019至2020年度畢業生就業數據顯示，有70.3%嘅畢業生有全職工作，而失業率有2.38%。相信好多人都經歷過即將畢業要四圍去見工揾工，亦都好明白當中害怕會揾唔到工嘅徬徨同無助。

你又有冇因為揾工而恐懼？

點解會覺得有壓力？

壓力其實主要都係嚟自自己同身邊人，當見到身邊嘅同學、朋友仔一個個都開始收到offer，而自己仍然喺道埋頭苦幹揾工，有比較嘅時候就自自然會對自己有質疑同覺得有壓力，驚自己會唔會一路都冇offer。同時屋企人又有機會過嚟關心下你/囉嗦下你，「點解仲唔揾工啊」、「做咩仲未揾到嘢做」等等嘅句子相信有唔少朋友都有聽過，久而久之都會形成壓力。

唔好俾自己太大壓力

有咩心得可以提高命中率？

1. 保持不斷學習嘅心態

所謂學到老活到老，即使大家已經大學畢業，都要保持不斷繼續學習新知識嘅心態。通過持續學習，不斷裝備自己，可以令到自己識得更多唔同嘅技能。呢啲學識咗嘅技能就會幫你提升兢爭力，同時亦可以喺面試時俾面試官知道你冇白白浪費呢一段時間。所以，喺未揾到工作嘅時間，大家都不仿發掘一下興趣，學習一啲自己有興趣嘅知識同技能。

未揾到工嘅不仿揾啲嘢學

2. Interview嘅時候唔好驚，俾啲自信

初入社會，見工會緊張係在所難免嘅，但緊張還緊張，千萬唔可以俾in你嘅部門主管同HR見到你驚。當你俾對方見到你怯緊，首先氣勢上已經輸咗，俾人嘅第一印象已經唔好，而且仲會更容易犯錯，打亂自己嘅部署。相反展現出自信嘅一面更容易會獲得面試官嘅留意，所以請記緊喺interview嘅時候一定要俾面試官睇到自己自信。