警世！入到大學千祈唔好做以下嘅事…
喺享受大學生活嘅同時，有兩件事請謹記喺大學入面一定唔可以做，否則會帶嚟好嚴重嘅後果。喺大學角度，佢哋好重視學生是否誠實，如果發現學生有任何學術上嘅不誠實/欺詐行為，大學方面係絕對會嚴懲有關嘅學生。咁有啲咩係包含喺學術上嘅不誠實/欺詐行為入面呢？
唔好做學術上不誠實嘅行為
1. 抄襲
大學第一項嚴禁嘅行為就係抄襲(plagiarism)。呢道嘅抄襲大概就係指抄錄其他人嘅作品，再用喺自己嘅作品中。所以，所有大學生喺第一個學期嘅時候，大學係會好清楚咁指示所以學生喺引用其他人嘅作品嘅時候一定要落reference同教學生落reference嘅標準格式，呢道大家係一定要跟足，避免被當係抄襲！另外，抄寫自己以前交過嘅功課/作品，又或者抄同學嘅功課，喺大學都會當作係抄襲嘅一種，大學係會有system專門去check抄襲呢種行為，大家千祈唔好試啦！
大學嚴禁抄襲，抄自己都唔得
2. 作弊
大學係嚴打學生作弊，亦即係我哋平時所講嘅“出貓“。有人可能會喺中小學都已經試過出貓，但係千祈唔好喺大學做同樣嘅事，亦唔好有僥倖嘅心態覺得只要唔俾人捉到就會冇事。因為喺中小學出貓俾老師捉到可能只係留堂記缺點見家長了事，但大學出貓俾人捉到個嚴重性同後果係好唔同。
千祈唔好喺大學入面出貓
後果
做錯事理所當然地會有相應嘅後果，而當學生俾人揭發抄襲或者作弊行為嘅時候，所帶嚟嘅後果會比大部分人想像中嚴重，住住係絕大部分人都難以承受。呢道所講嘅後果，輕則就會就讀嘅嗰一科F咗要重讀，重則就可能需要見Board同埋會喺你嘅Transcript入面留低一個“Academic Dishonesty”嘅記錄，而呢個記錄將會影響你嘅一生。
抄襲同作弊會令你後悔莫及
1. 仕途玩完
一般而言，大部分公司或機構嘅HR喺見到大學張Transcript入面有一個“Academic Dishonesty”嘅記錄，都會第一時間拒絕嗰位申請者，因為冇乜公司會願意聘用有唔誠實記錄嘅人。即係話好大機會係連interview嘅機會都唔會有，亦代表佢會好難揾到工，佢哋仕途已經完結。
機構不會聘用不誠實的人
2. 截斷升學道路
Academic Dishonesty係學術界嘅死罪，如果你嘅Transcript/畢業證書入面留有一個Academic Dishonesty嘅記錄，咁你就唔使旨意將來繼續再讀書升學了。因為絕大部分嘅學院喺見到你有Academic Dishonesty嘅記錄之後，都將會毫不猶豫咁拒絕你嘅申請，可以話呢個記錄已經將你將來繼續再讀書升學嘅路徹底截斷。
學術不誠實係學術界死罪
總結
總括嚟講，喺大學俾人捉到抄襲或者出貓嘅後果係非常嚴重，大家千祈唔好試，因為真係會影響一生。
